ಶಿವವಂದನಮ್

ಪ್ರಭುಮೀಶಮನೀಶಮಶೇಷಗುಣಂ ಗುಣಹೀನಮಹೀಶಗರಾಭರಣಮ್ | ರಣನಿರ್ಜಿತದುರ್ಜಯದೈತ್ಯಪುರಂ ಪ್ರಣಮಾಮಿ ಶಿವಂ ಶಿವಕಲ್ಪತರುಮ್ || ಗಿರಿರಾಜಸುತಾನ್ವಿತವಾಮತನುಂ ತನುನಿಂದಿತರಾಜಿತಕೋಟಿವಿಧುಮ್ | ವಿಧಿವಿಷ್ಣುಶಿರೋಧೃತಪಾದಯುಗಂ ಪ್ರಣಮಾಮಿ ಶಿವಂ ಶಿವಕಲ್ಪತರುಮ್ || ಶಶಿಲಾಂಛಿತರಂಜಿತಸನ್ಮುಕುಟಂ ಕಟಿಲಂಬಿತಸುಂದರಕೃತ್ತಿಪಟಮ್ | ಸುರಶೈವಲಿನೀಕೃತಪೂತಜಟಂ ಪ್ರಣಮಾಮಿ ಶಿವಂ ಶಿವಕಲ್ಪತರುಮ್ || ನಯನತ್ರಯಭೂಷಿತಚಾರುಮುಖಂ ಮುಖಪದ್ಮಪರಾಜಿತಕೋಟಿವಿಧುಮ್ | ವಿಧುಖಂಡವಿಮಂಡಿತಭಾಲತಟಂ ಪ್ರಣಮಾಮಿ ಶಿವಂ ಶಿವಕಲ್ಪತರುಮ್ || ವೃಷರಾಜನಿಕೇತನಮಾದಿಗುರುಂ ಗರಲಾಶನಮಾಜಿವಿಷಾಣಧರಮ್ | ಪ್ರಮಥಾಧಿಪಸೇವಕರಂಜನಕಂ ಪ್ರಣಮಾಮಿ ಶಿವಂ ಶಿವಕಲ್ಪತರುಮ್ || ಮಕರಧ್ವಜಮತ್ತಮತಂಗಹರಂ ಕರಿಚರ್ಮಗನಾಗವಿಬೋಧಕರಮ್ | ವರಮಾರ್ಗಣಶೂಲವಿಧಾನಧರಂ ಪ್ರಣಮಾಮಿ ಶಿವಂ ಶಿವಕಲ್ಪತರುಮ್ || ಜಗದುದ್ಭವಪಾಲನನಾಶಕರಂ ತ್ರಿದಿವೇಶಶಿರೋಮಣಿಘೃಷ್ಟಪದಮ್ | ಪ್ರಿಯಮಾನವಸಾಧುಜನೈಕಗತಿಂ ಪ್ರಣಮಾಮಿ ಶಿವಂ ಶಿವಕಲ್ಪತರುಮ್ ||