ಶಿವ-ಕೇಶಾದಿ-ಪಾದಾಂತ-ವರ್ಣನ-ಸ್ತೋತ್ರಂ

ದೇಯಾಸುರ್ಮೂರ್ಧ್ನಿ ರಾಜತ್ಸರಸಸುರಸರಿತ್ಪಾರಪರ್ಯಂತನಿರ್ಯ- ತ್ಪ್ರಾಂಶುಸ್ತಂಬಾಃ ಪಿಶಂಗಾಸ್ತುಲಿತಪರಿಣತಾರಕ್ತಶಾಲೀಲತಾ ವಃ | ದುರ್ವಾರಾಪತ್ತಿಗರ್ತಶ್ರಿತನಿಖಿಲಜನೋತ್ತಾರಣೇ ರಜ್ಜುಭೂತಾಃ ಘೋರಾಘೋರ್ವೀರುಹಾಲೀದಹನಶಿಖಿಶಿಖಾಃ ಶರ್ಮ ಶಾರ್ವಾಃ ಕಪರ್ದಾಃ || ೧ || ಕುರ್ವನ್ನಿರ್ವಾಣಮಾರ್ಗಪ್ರಗಮಪರಿಲಸದ್ರೂಪ್ಯಸೋಪಾನಶಂಕಾಂ ಶಕ್ರಾರೀಣಾಂ ಪುರಾಣಾಂ ತ್ರಯವಿಜಯಕೃತಸ್ಪಷ್ಟರೇಖಾಯಮಾಣಂ | ಅವ್ಯಾದವ್ಯಾಜಮುಚ್ಚೈರಲಿಕಹಿಮಧರಾಧಿತ್ಯಕಾಂತಸ್ತ್ರಿಧೋದ್ಯ- ಜಾಹ್ನವ್ಯಾಭಂ ಮೃಡಾನೀಕಮಿತುರುಡುಪರುಕ್ಪಾಂಡರಂ ವಸ್ತ್ರಿಪುಂಡ್ರಂ || ೨ || ಕ್ರುಧ್ಯದ್ಗೌರೀಪ್ರಸಾದಾನತಿಸಮಯಪದಾಂಗುಷ್ಟಸಂಕ್ರಾಂತಲಾಕ್ಷಾ- ಬಿಂದುಸ್ಪರ್ಧಿ ಸ್ಮರಾರೇಃ ಸ್ಫಟಿಕಮಣಿದೃಷನ್ಮಗ್ನಮಾಣಿಕ್ಯಶೋಭಂ | ಮೂರ್ಧ್ನ್ಯುದ್ಯದ್ದಿವ್ಯಸಿಂಧೋಃ ಪತಿತಶಫರಿಕಾಕಾರಿ ವೋ ಮಾಸ್ತಕಂ ಸ್ತಾ- ದಸ್ತೋಕಾಪತ್ತಿಕೃತ್ಯೈ ಹುತವಹಕಣಿಕಾಮೋಕ್ಷರೂಕ್ಷಂ ಸದಾಕ್ಷಿ || ೩ || ಭೂತ್ಯೈ ದೃಗ್ಭೂತಯೋಃ ಸ್ಯಾದ್ಯದಹಿಮಹಿಮರುಗ್ಬಿಂಬಯೋಃ ಸ್ನಿಗ್ಧವರ್ಣೋ ದೈತ್ಯೌಘಧ್ವಂಸಶಂಸೀ ಸ್ಫುಟ ಇವ ಪರಿವೇಷಾವಶೇಷೋ ವಿಭಾತಿ | ಸರ್ಗಸ್ಥಿತ್ಯಂತವೃತ್ತಿರ್ಮಯಿ ಸಮುಪಗತೇತೀವ ನಿರ್ವೃತ್ತಗರ್ವಂ ಶರ್ವಾಣೀಭರ್ತುರುಚ್ಚೈರ್ಯುಗಲಮಥ ದಧದ್ವಿಭ್ರಮಂ ತದ್ಭ್ರುವೋರ್ವಃ || ೪ || ಯುಗ್ಮೇ ರುಕ್ಮಾಬ್ಜಪಿಂಗೇ ಗ್ರಹ ಇವ ಪಿಹಿತೇ ದ್ರಾಗ್ಯಯೋಃ ಪ್ರಾಗ್ದುಹಿತ್ರಾ ಶೈಲಸ್ಯ ಧ್ವಾಂತನೀಲಾಂಬರರಚಿತಬೃಹತ್ಕಂಚುಕೋಽಭೂತ್ಪ್ರಪಂಚಃ | ತೇ ತ್ರೈನೇತ್ರೇ ಪವಿತ್ರೇ ತ್ರಿದಶವರಘಟಾಮಿತ್ರಜೈತ್ರೋಗ್ರಶಸ್ತ್ರೇ ನೇತ್ರೇ ನೇತ್ರೇ ಭವೇತಾಂ ದ್ರುತಮಿಹ ಭವತಾಮಿಂದ್ರಿಯಾಶ್ವಾನ್ನಿಯಂತುಂ || ೫ || ಚಂಡೀವಕ್ತ್ರಾರ್ಪಣೇಚ್ಛೋಸ್ತದನು ಭಗವತಃ ಪಾಂಡುರುಕ್ಪಾಂಡುಗಂಡ- ಪ್ರೋದ್ಯತ್ಕಂಡೂಂ ವಿನೇತುಂ ವಿತನುತ ಇವ ಯೇ ರತ್ನಕೋಣೈರ್ವಿಘೃಷ್ಟಿಂ | ಚಂಡಾರ್ಚಿರ್ಮಂಡಲಾಭೇ ಸತತನತಜನಧ್ವಾಂತಖಂಡಾತಿಶೌಂಡೇ ಚಾಂಡೀಶೇ ತೇ ಶ್ರಿಯೇ ಸ್ತಾಮಧಿಕಮವನತಾಖಂಡಲೇ ಕುಂಡಲೇ ವಃ || ೬|| ಖಡ್ವಾಂಗೋದಗ್ರಪಾಣೇಃ ಸ್ಫುಟವಿಕಟಪುಟೋ ವಕ್ತ್ರರಂಧ್ರಪ್ರವೇಶ- ಪ್ರೇಪ್ಸೂದಂಚತ್ಫಣೋರುಶ್ವಸದತಿಧವಲಾಹೀಂದ್ರಶಂಕಾಂ ದಧಾನಃ | ಯುಷ್ಮಾಕಂ ಕಮ್ರವಕ್ತ್ರಾಂಬುರುಹಪರಿಲಸತ್ಕರ್ಣಿಕಾಕಾರಶೋಭಃ ಶಶ್ವತ್ತ್ರಾಣಾಯ ಭೂಯಾದಲಮತಿವಿಮಲೋತ್ತುಂಗಕೋಣಃ ಸ ಘೋಣಃ || ೭ || ಕ್ರುಧ್ಯತ್ಯದ್ಧಾ ಯಯೋಃ ಸ್ವಾಂ ತನುಮತಿಲಸತೋರ್ಬಿಂಬಿತಾಂ ಲಕ್ಷಯಂತೀ ಭರ್ತ್ರೇ ಸ್ಪರ್ಧಾತಿನಿಘ್ನಾ ಮುಹುರಿತರವಧೂಶಂಕಯಾ ಶೈಲಕನ್ಯಾ | ಯುಷ್ಮಾಂಸ್ತೌ ಶಶ್ವದುಚ್ಚೈರಬಹುಲದಶಮೀಶರ್ವರೀಶಾತಿಶುಭ್ರೌ ಅವ್ಯಾಸ್ತಾಂ ದಿವ್ಯಸಿಂಧೋಃ ಕಮಿತುರವನಮಲ್ಲೋಕಪಾಲೌ ಕಪೋಲೌ || ೮|| ಯೋ ಭಾಸಾ ಭಾತ್ಯುಪಾಂತಸ್ಥಿತ ಇವ ನಿಭೃತಂ ಕೌಸ್ತುಭೋ ದ್ರಷ್ಟುಮಿಚ್ಛ- ನ್ಸೋತ್ಥಸ್ನೇಹಾನ್ನಿತಾಂತಂ ಗಲಗತಗರಲಂ ಪತ್ಯುರುಚ್ಚೈಃ ಪಶೂನಾಂ | ಪ್ರೋದ್ಯತ್ಪ್ರೇಮ್ಣಾ ಯಮಾರ್ದ್ರಾ ಪಿಬತಿ ಗಿರಿಸುತಾ ಸಂಪದಃ ಸಾತಿರೇಕಾ ಲೋಕಾಃ ಶೋಣೀಕೃತಾಂತಾ ಯದಧರಮಹಸಾ ಸೋಽಧರೋ ವೋ ವಿಧತ್ತಾಂ || ೯|| ಅತ್ಯರ್ಥಂ ರಾಜತೇ ಯಾ ವದನಶಶಧರಾದುದ್ಗಲಚ್ಚಾರುವಾಣೀ- ಪೀಯೂಷಾಂಭಃಪ್ರವಾಹಪ್ರಸರಪರಿಲಸತ್ಫೇನಬಿಂದ್ವಾವಲೀವ | ದೇಯಾತ್ಸಾ ದಂತಪಂಕ್ತಿಶ್ಚಿರಮಿಹ ದನುದಾಯಾದದೌವಾರಿಕಸ್ಯ ದ್ಯುತ್ಯಾ ದೀಪ್ತೇಂದುಕುಂದಚ್ಛವಿರಮಲತರಪ್ರೋನ್ನತಾಗ್ರಾ ಮುದಂ ವಃ || ೧೦ || ನ್ಯಕ್ಕುರ್ವನ್ನುರ್ವರಾಭೃನ್ನಿಭಘನಸಮಯೋದ್ಘುಷ್ಟಮೇಘೌಘಘೋಷಂ ಸ್ಫೂರ್ಜದ್ವಾರ್ಧ್ಯುತ್ಥಿತೋರುಧ್ವನಿತಮಪಿ ಪರಬ್ರಹ್ಮಭೂತೋ ಗಭೀರಃ | ಸುವ್ಯಕ್ತೋ ವ್ಯಕ್ತಮೂರ್ತೇಃ ಪ್ರಕಟಿತಕರಣಃ ಪ್ರಾಣನಾಥಸ್ಯ ಸತ್ಯಾಃ ಪ್ರೀತ್ಯಾ ವಃ ಸಂವಿದಧ್ಯಾತ್ಫಲವಿಕಲಮಲಂ ಜನ್ಮನಾಧಃ ಸ ನಾದಃ || ೧೧|| ಭಾಸಾ ಯಸ್ಯ ತ್ರಿಲೋಕೀ ಲಸತಿ ಪರಿಲಸತ್ಫೇನಬಿಂದ್ವರ್ಣವಾಂತ- ರ್ವ್ಯಾಮಗ್ನೇವಾತಿಗೌರಸ್ತುಲಿತಸುರಸರಿದ್ವಾರಿಪೂರಪ್ರಸಾರಃ | ಪೀನಾತ್ಮಾ ದಂತಭಾಭಿರ್ಭೃಶಮಹಹಹಕಾರಾತಿಭೀಮಃ ಸದೇಷ್ಟಾಂ ಪುಷ್ಟಾಂ ತುಷ್ಟಿಂ ಕೃಷೀಷ್ಟ ಸ್ಫುಟಮಿಹ ಭವತಾಮಟ್ಟಹಾಸೋಽಷ್ಟಮೂರ್ತೇಃ || ೧೨ || ಸದ್ಯೋಜಾತಾಖ್ಯಮಾಪ್ಯಂ ಯದು ವಿಮಲಮುದಗ್ವರ್ತಿ ಯದ್ವಾಮದೇವಂ ನಾಮ್ನಾ ಹೇಮ್ನಾ ಸದೃಕ್ಷಂ ಜಲದನಿಭಮಘೋರಾಹ್ವಯಂ ದಕ್ಷಿಣಂ ಯತ್ | ಯದ್ಬಾಲಾರ್ಕಪ್ರಭಂ ತತ್ಪುರುಷನಿಗದಿತಂ ಪೂರ್ವಮೀಶಾನಸಂಜ್ಞಂ ಯದ್ದಿವ್ಯಂ ತಾನಿ ಶಂಭೋರ್ಭವದಭಿಲಷಿತಂ ಪಂಚ ದದ್ಯುರ್ಮುಖಾನಿ || ೧೩ || ಆತ್ಮಪ್ರೇಮ್ಣೋ ಭವಾನ್ಯಾ ಸ್ವಯಮಿವ ರಚಿತಾಃ ಸಾದರಂ ಸಾಂವನನ್ಯಾ ಮಷ್ಯಾ ತಿಸ್ರಃ ಸುನೀಲಾಂಜನನಿಭಗಲರೇಖಾಃ ಸಮಾಭಾಂತಿ ಯಸ್ಯಾಂ | ಆಕಲ್ಪಾನಲ್ಪಭಾಸಾ ಭೃಶರುಚಿರತರಾ ಕಂಬುಕಲ್ಪಾಂಬಿಕಾಯಾಃ ಪತ್ಯುಃ ಸಾತ್ಯಂತಮಂತರ್ವಿಲಸತು ಸತತಂ ಮಂಥರಾ ಕಂಧರಾ ವಃ || ೧೪|| ವಕ್ತ್ರೇಂದೋರ್ದಂತಲಕ್ಷ್ಮ್ಯಾಶ್ಚಿರಮಧರಮಹಾಕೌಸ್ತುಭಸ್ಯಾಪ್ಯುಪಾಂತೇ ಸೋತ್ಥಾನಾಂ ಪ್ರಾರ್ಥಯನ್ಯಃ ಸ್ಥಿತಿಮಚಲಭುವೇ ವಾರಯಂತ್ಯೈ ನಿವೇಶಂ | ಪ್ರಾಯುಂಕ್ತೇವಾಶಿಷೋ ಯಃ ಪ್ರತಿಪದಮಮೃತತ್ವೇ ಸ್ಥಿತಃ ಕಾಲಶತ್ರೋಃ ಕಾಲಂ ಕುರ್ವನ್ಗಲಂ ವೋ ಹೃದಯಮಯಮಲಂ ಕ್ಷಾಲಯೇತ್ಕಾಲಕೂಟಃ || ೧೫ || ಪ್ರೌಢಪ್ರೇಮಾಕುಲಾಯಾ ದೃಢತರಪರಿರಂಭೇಷು ಪರ್ವೇಂದುಮುಖ್ಯಾಃ ಪಾರ್ವತ್ಯಾಶ್ಚಾರುಚಾಮೀಕರವಲಯಪದೈರಂಕಿತಂ ಕಾಂತಿಶಾಲಿ | ರಂಗನ್ನಾಗಾಂಗದಾಢ್ಯಂ ಸತತಮವಿಹಿತಂ ಕರ್ಮ ನಿರ್ಮೂಲಯೇತ್ತ- ದ್ದೋರ್ಮೂಲಂ ನಿರ್ಮಲಂ ಯದ್ಧೃದಿ ದುರಿತಮಪಾಸ್ಯಾರ್ಜಿತಂ ಧೂರ್ಜಟೇರ್ವಃ || ೧೬ || ಕಂಠಾಶ್ಲೇಷಾರ್ಥಮಾಪ್ತಾ ದಿವ ಇವ ಕಮಿತುಃ ಸ್ವರ್ಗಸಿಂಧೋಃ ಪ್ರವಾಹಾಃ ಕ್ರಾಂತ್ಯೈ ಸಂಸಾರಸಿಂಧೋಃ ಸ್ಫಟಿಕಮಣಿಮಹಾಸಂಕ್ರಮಾಕಾರದೀರ್ಘಾಃ | ತಿರ್ಯಗ್ವಿಷ್ಕಂಭಭೂತಾಸ್ತ್ರಿಭುವನವಸತೇರ್ಭಿನ್ನದೈತ್ಯೇಭದೇಹಾ ವಾಹಾ ವಸ್ತಾ ಹರಸ್ಯ ದ್ರುತಮಿಹ ನಿವಹಾನಂಹಸಾಂ ಸಂಹರಂತು || ೧೭ || ವಕ್ಷೋ ದಕ್ಷದ್ವಿಷೋಽಲಂ ಸ್ಮರಭರವಿನಮದ್ದಕ್ಷಜಾಕ್ಷೀಣವಕ್ಷೋ- ಜಾಂತರ್ನಿಕ್ಷಿಪ್ತಶುಂಭನ್ಮಲಯಜಮಿಲಿತೋದ್ಭಾಸಿ ಭಸ್ಮೋಕ್ಷಿತಂ ಯತ್ | ಕ್ಷಿಪ್ರಂ ತದ್ರೂಕ್ಷಚಕ್ಷುಃಶ್ರುತಿಗಣಫಣರತ್ನೌಘಭಾಭೀಕ್ಷ್ಣಶೋಭಂ ಯುಷ್ಮಾಕಂ ಶಶ್ವದೇನಃ ಸ್ಫಟಿಕಮಣಿಶಿಲಾಮಂಡಲಾಭಂ ಕ್ಷಿಣೋತು ||೧೮|| ಮುಕ್ತಾಮುಕ್ತೇ ವಿಚಿತ್ರಾಕುಲವಲಿಲಹರೀಜಾಲಶಾಲಿನ್ಯವಾಂಚ- ನ್ನಾಭ್ಯಾವರ್ತೇ ವಿಲೋಲದ್ಭುಜಗವರಯುತೇ ಕಾಲಶತ್ರೋರ್ವಿಶಾಲೇ | ಯುಷ್ಮಚ್ಚಿತ್ತತ್ರಿಧಾಮಾ ಪ್ರತಿನವರುಚಿರೇ ಮಂದಿರೇ ಕಾಂತಿಲಕ್ಷ್ಮ್ಯಾಃ ಶೇತಾಂ ಶೀತಾಂಶುಗೌರೇ ಚಿರತರಮುದರಕ್ಷೀರಸಿಂಧೌ ಸಲೀಲಂ || ೧೯ || ವೈಯಾಘ್ರೀ ಯತ್ರ ಕೃತ್ತಿಃ ಸ್ಫುರತಿ ಹಿಮಗಿರೇರ್ವಿಸ್ತೃತೋಪತ್ಯಕಾಂತಃ ಸಾಂದ್ರಾವಶ್ಯಾಯಮಿಶ್ರಾ ಪರಿತ ಇವ ವೃತಾ ನೀಲಜೀಮೂತಮಾಲಾ | ಆಬದ್ಧಾಹೀಂದ್ರಕಾಂಚೀಗುಣಮತಿಪೃಥುಲಂ ಶೈಲಜಾಕ್ರೀಡಭೂಮಿ- ಸ್ತದ್ವೋ ನಿಃಶ್ರೇಯಸೇ ಸ್ಯಾಜ್ಜಘನಮತಿಘನಂ ಬಾಲಶೀತಾಂಶುಮೌಲೇಃ || ೨೦ || ಪುಷ್ಟಾವಷ್ಟಂಭಭೂತೌ ಪೃಥುತರಜಘನಸ್ಯಾಪಿ ನಿತ್ಯಂ ತ್ರಿಲೋಕ್ಯಾಃ ಸಮ್ಯಗ್ವೃತ್ತೌ ಸುರೇಂದ್ರದ್ವಿರದವರಕರೋದಾರಕಾಂತಿಂ ದಧಾನೌ | ಸಾರಾವೂರೂ ಪುರಾರೇಃ ಪ್ರಸಭಮರಿಘಟಾಘಸ್ಮರೌ ಭಸ್ಮಶುಭ್ರೌ ಭಕ್ತೈರತ್ಯಾರ್ದ್ರಚಿತ್ತೈರಧಿಕಮವನತೌ ವಾಂಛಿತಂ ವೋ ವಿಧತ್ತಾಂ || ೨೧ || ಆನಂದಾಯೇಂದುಕಾಂತೋಪಲರಚಿತಸಮುದ್ಗಾಯಿತೇ ಯೇ ಮುನೀನಾಂ ಚಿತ್ತಾದರ್ಶಂ ನಿಧಾತುಂ ವಿದಧತಿ ಚರಣೇ ತಾಂಡವಾಕುಂಚನಾನಿ | ಕಾಂಚೀಭೋಗೀಂದ್ರಮೂರ್ಧ್ನಾಂ ಪ್ರತಿಮುಹುರುಪಧಾನಾಯಮಾನೇ ಕ್ಷಣಂ ತೇ ಕಾಂತೇ ಸ್ತಾಮಂತಕಾರೇರ್ದ್ಯುತಿವಿಜಿತಸುಧಾಭಾನುನೀ ಜಾನುನೀ ವಃ || ೨೨|| ಮಂಜೀರೀಭೂತಭೋಗಿಪ್ರವರಗಣಫಣಾಮಂಡಲಾಂತರ್ನಿತಾಂತ- ವ್ಯಾದೀರ್ಘಾನರ್ಘರತ್ನದ್ಯುತಿಕಿಸಲಯಿತೇ ಸ್ತೂಯಮಾನೇ ದ್ಯುಸದ್ಭಿಃ | ಬಿಭ್ರತ್ಯೌ ವಿಭ್ರಮಂ ವಃ ಸ್ಫಟಿಕಮಣಿಬೃಹದ್ದಂಡವದ್ಭಾಸಿತೇ ಯೇ ಜಂಘೇ ಶಂಖೇಂದುಶುಭ್ರೇ ಭೃಶಮಿಹ ಭವತಾಂ ಮಾನಸೇ ಶೂಲಪಾಣೇಃ || ೨೩ || ಅಸ್ತೋಕಸ್ತೋಮಶಸ್ತ್ರೈರಪಚಿತಿಮಮಲಾಂ ಭೂರಿಭಾವೋಪಹಾರೈಃ ಕುರ್ವದ್ಭಿಃ ಸರ್ವದೋಚ್ಚೈಃ ಸತತಮಭಿವೃತೌ ಬ್ರಹ್ಮವಿದ್ದೇವಲಾದ್ಯೈಃ | ಸಮ್ಯಕ್ಸಂಪೂಜ್ಯಮಾನಾವಿಹ ಹೃದಿ ಸರಸೀವಾನಿಶಂ ಯುಷ್ಮದೀಯೇ ಶರ್ವಸ್ಯ ಕ್ರೀಡತಾಂ ತೌ ಪ್ರಪದವರಬೃಹತ್ಕಚ್ಛಪಾವಚ್ಛಭಾಸೌ || ೨೪ || ಯಾಃ ಸ್ವಸ್ಯೈಕಾಂಶಪಾತಾದತಿಬಹಲಗಲದ್ರಕ್ತವಕ್ತ್ರಂ ಪ್ರಣುನ್ನ- ಪ್ರಾಣಂ ಪ್ರಾಕ್ರೋಶಯಂಪ್ರಾಙ್ನಿಜಮಚಲವರಂ ಚಾಲಯಂತಂ ದಶಾಸ್ಯಂ | ಪಾದಾಂಗುಲ್ಯೋ ದಿಶಂತು ದ್ರುತಮಯುಗದೃಶಃ ಕಲ್ಮಷಪ್ಲೋಷಕಲ್ಯಾಃ ಕಲ್ಯಾಣಂ ಫುಲ್ಲಮಾಲ್ಯಪ್ರಕರವಿಲಸಿತಾ ವಃ ಪ್ರಣದ್ಧಾಹಿವಲ್ಲ್ಯಃ || ೨೫|| ಪ್ರಹ್ವಪ್ರಾಜೀನಬರ್ಹಿಃಪ್ರಮುಖಸುರವರಪ್ರಸ್ಫುರನ್ಮೌಲಿಸಕ್ತ- ಜ್ಯಾಯೋರತ್ನೋತ್ಕರೋಸ್ರೈರವಿರತಮಮಲಾ ಭೂರಿನೀರಾಜಿತಾ ಯಾ | ಪ್ರೋದಗ್ರಾಗ್ರಾ ಪ್ರದೇಯಾತ್ತತಿರಿವ ರುಚಿರಾ ತಾರಕಾಣಾಂ ನಿತಾಂತಂ ನೀಲಗ್ರೀವಸ್ಯ ಪಾದಾಂಬುರುಹವಿಲಸಿತಾ ಸಾ ನಖಾಲೀ ಸುಖಂ ವಃ || ೨೬|| ಸತ್ಯಾಃ ಸತ್ಯಾನನೇಂದಾವಪಿ ಸವಿಧಗತೇ ಯೇ ವಿಕಾಸಂ ದಧಾತೇ ಸ್ವಾಂತೇ ಸ್ವಾಂ ತೇ ಲಭಂತೇ ಶ್ರಿಯಮಿಹ ಸರಸೀವಾಮರಾ ಯೇ ದಧಾನಾಃ | ಲೋಲಂ ಲೋಲಂಬಕಾನಾಂ ಕುಲಮಿವ ಸುಧಿಯಾಂ ಸೇವತೇ ಯೇ ಸದಾ ಸ್ತಾಂ ಭೂತ್ಯೈ ಭೂತ್ಯೈಣಪಾಣೇರ್ವಿಮಲತರರುಚಸ್ತೇ ಪದಾಂಭೋರುಹೇ ವಃ || ೨೭ || ಯೇಷಾಂ ರಾಗಾದಿದೋಷಾಕ್ಷತಮತಿ ಯತಯೋ ಯಾಂತಿ ಮುಕ್ತಿಂ ಪ್ರಸಾದಾ- ದ್ಯೇ ವಾ ನಮ್ರಾತ್ಮಮೂರ್ತಿದ್ಯುಸದೃಷಿಪರಿಷನ್ಮೂರ್ಧ್ನಿ ಶೇಷಾಯಮಾಣಾಃ | ಶ್ರೀಕಂಠಸ್ಯಾರುಣೋದ್ಯಚ್ಚರಣಸರಸಿಜಪ್ರೋತ್ಥಿತಾಸ್ತೇ ಭವಾಖ್ಯಾ- ತ್ಪಾರಾವಾರಾಚ್ಚಿರಂ ವೋ ದುರಿತಹತಿಕೃತಸ್ತಾರಯೇಯುಃ ಪರಾಗಾಃ || ೨೮ || ಭೂಮ್ನಾ ಯಸ್ಯಾಸ್ತಸೀಮ್ನಾ ಭುವನಮನುಸೃತಂ ಯತ್ಪರಂ ಧಾಮ ಧಾಮ್ನಾಂ ಸಾಮ್ನಾಮಾಮ್ನಾಯತತ್ತ್ವಂ ಯದಪಿ ಚ ಪರಮಂ ಯದ್ಗುಣಾತೀತಮಾದ್ಯಂ | ಯಚ್ಚಾಂಹೋಹೃನ್ನಿರೀಹಂ ಗಹನಮಿತಿ ಮುಹುಃ ಪ್ರಾಹುರುಚ್ಚೈರ್ಮಹಾಂತೋ ಮಾಹೇಶಂ ತನ್ಮಹೋ ಮೇ ಮಹಿತಮಹರಹರ್ಮೋಹರೋಹಂ ನಿಹಂತು || ೨೯ ||