ಎಲ್ಲಾ ರೂಪವು ತಾನಂತೆ ಶಿವ

ಎಲ್ಲಾ ರೂಪವು ತಾನಂತೆ ಶಿವ- ನೆಲ್ಲೆಲ್ಲಿಯು ತಾನಿಹನಂತೆ ಅಲ್ಲಲ್ಲರಸುತ ಗುಡಿಗಳ ತಿರುಗುವ ಕಳ್ಳರ ಕಣ್ಣಿಗೆ ಮಣ್ಣಂತೆ ॥ ಕಣ್ಣೆಂಬುದು ತನಗಿಲ್ಲಂತೆ ಕಣ್ಣಿಗೆ ಕಣ್ಣಾಗಿಹನಂತೆ ಕಣ್ಣು ಬಿಟ್ಟು ತನ್ನರಸುವ ಜನರಿಗೆ ಬಣ್ಣ-ಬಣ್ಣವಾಗಿಹನಂತೆ || ದೃಶ್ಯವಿದಾದವ ತಾನಂತೆ ದೃಶ್ಯವನರಿವನು ತಾನಂತೆ ದೃಶ್ಯಾದೃಕ್ಕಿನೊಳೆರಡರ ನಡುವೆ ಶಾಶ್ವತನಾದವ ತಾನಂತೆ ॥ ಕಳೆದುಳಿಯುವುದೇ ತಾನಂತೆ ಉಳಿಯುವ ಕಳೆಯುವರಿಲ್ಲಂತೆ ಕುಲಶೀಲಗಳೆಂಬ ಕೊಳೆಯಿಲ್ಲದೆ ನಿರ್‌- ಮಲದೊಳಗಿರುವನು ತಾನಂತೆ ॥