ನಾರದ ಭಕ್ತಿ ಸೂತ್ರಗಳು

ಅಥಾತೋ ಭಕ್ತಿಂ ವ್ಯಾಖ್ಯಾಸ್ಯಾಮಃ | ೧ | ಸಾ ತ್ವಸ್ಮಿನ್ ಪರಪ್ರೇಮರೂಪಾ | ೨ | ಅಮೃತಸ್ವರೂಪಾ ಚ | ೩ | ಯಲ್ಲಬ್ಧ್ವಾ ಪುಮಾನ್ ಸಿದ್ಧೋ ಭವತಿ ಅಮೃತೋ ಭವತಿ ತೃಪ್ತೋ ಭವತಿ | ೪ | ಯತ್ಪ್ರಾಪ್ಯ ನ ಕಿಂಚಿದ್ ವಾಂಛತಿ ನ ಶೋಚತಿ ನ ದ್ವೇಷ್ಟಿ ನ ರಮತೇ ನೋತ್ಸಾಹೀ ಭವತಿ | ೫ | ಯಜ್ಜ್ಞಾತ್ವಾ ಮತ್ತೋ ಭವತಿ ಸ್ತಬ್ಧೋ ಭವತಿ ಆತ್ಮಾರಾಮೋ ಭವತಿ | ೬ | ಸಾ ನ ಕಾಮಯಮಾನಾ ನಿರೋಧರೂಪತ್ವಾತ್ | ೭ | ನಿರೋಧಸ್ತು ಲೋಕವೇದವ್ಯಾಪಾರನ್ಯಾಸಃ | ೮ | ತಸ್ಮಿನ್ನನನ್ಯತಾ ತದ್ವಿರೋಧಿಷೂದಾಸೀನತಾ ಚ | ೯ | ಅನ್ಯಾಶ್ರಯಾಣಾಂ ತ್ಯಾಗೋನನ್ಯತಾ | ೧೦ | ಲೋಕವೇದೇಷು ತದನುಕೂಲಾಚರಣಂ ತದ್ವಿರೋಧಿಷೂದಾಸೀನತಾ | ೧೧ | ಭವತು ನಿಶ್ಚಯದಾರ್ಢ್ಯಾದೂರ್ಧ್ವಂ ಶಾಸ್ತ್ರರಕ್ಷಣಂ | ೧೨ | ಅನ್ಯಥಾ ಪಾತಿತ್ಯಶಂಕಯಾ | ೧೩ | ಲೋಕೋಽಪಿ ತಾವದೇವ ಭೋಜನಾದಿ ವ್ಯಾಪಾರಸ್ತ್ವಾಶರೀರಧಾರಣಾವಧಿ | ೧೪ | ತಲ್ಲಕ್ಷಣಾನಿ ವಾಚ್ಯಂತೇ ನಾನಾಮತಭೇದಾತ್ | ೧೫ | ಪೂಜಾದಿಷ್ವನುರಾಗ ಇತಿ ಪಾರಾಶರ್ಯಃ | ೧೬ | ಕಥಾದಿಷ್ವಿತಿ ಗರ್ಗಃ | ೧೭ | ಆತ್ಮರತ್ಯವಿರೋಧೇನೇತಿ ಶಾಂಡಿಲ್ಯಃ | ೧೮ | ನಾರದಸ್ತು ತದರ್ಪಿತಾಖಿಲಾಚಾರತಾ ತದ್ವಿಸ್ಮರಣೇ ಪರಮವ್ಯಾಕುಲತೇತಿ | ೧೯ | ಅಸ್ತ್ಯೇವಮೇವಂ | ೨೦ | ಯಥಾ ವ್ರಜಗೋಪಿಕಾನಾಂ | ೨೧ | ತತ್ರಾಪಿ ನ ಮಾಹಾತ್ಮ್ಯಜ್ಞಾನವಿಸ್ಮೃತ್ಯಪವಾದಃ | ೨೨ | ತದ್ವಿಹೀನಂ ಜಾರಾಣಾಮಿವ | ೨೩ | ನಾಸ್ತ್ಯೇವ ತಸ್ಮಿನ್ ತತ್ಸುಖಸುಖಿತ್ವಂ | ೨೪ | ಸಾ ತು ಕರ್ಮಜ್ಞಾನಯೋಗೇಭ್ಯೋಽಪ್ಯಧಿಕತರಾ | ೨೫ | ಫಲರೂಪತ್ತ್ವಾತ್ | ೨೬ | ಈಶ್ವರಸ್ಯಾಪ್ಯಭಿಮಾನದ್ವೇಷಿತ್ವಾತ್ ದೈನ್ಯಪ್ರಿಯತ್ವಾತ್ ಚ | ೨೭ | ತಸ್ಯಾಃ ಜ್ಞಾನಮೇವ ಸಾಧನಮಿತ್ಯೇಕೇ | ೨೮ | ಅನ್ಯೋನ್ಯಾಶ್ರಯತ್ವಮಿತ್ಯನ್ಯೇ | ೨೯ | ಸ್ವಯಂ ಫಲರೂಪತೇತಿ ಬ್ರಹ್ಮಕುಮಾರಃ | ೩೦ | ರಾಜಗೃಹಭೋಜನಾದಿಷು ತಥೈವ ದೃಷ್ಟತ್ವಾತ್ | ೩೧ | ನ ತೇನ ರಾಜಾ ಪರಿತೋಷಃ ಕ್ಷುಚ್ಛಾಂತಿರ್ವಾ | ೩೨ | ತಸ್ಮಾತ್ ಸೈವ ಗ್ರಾಹ್ಯಾ ಮುಮುಕ್ಷುಭಿಃ | ೩೩ | ತಸ್ಯಾಃ ಸಾಧನಾನಿ ಗಾಯಂತ್ಯಾಚಾರ್ಯಾಃ | ೩೪ | ತತ್ತು ವಿಷಯತ್ಯಾಗಾತ್ ಸಂಗತ್ಯಾಗಾತ್ ಚ | ೩೫ | ಅವ್ಯಾವೃತ್ತಭಜನಾತ್ | ೩೬ | ಲೋಕೇಽಪಿ ಭಗವದ್ಗುಣಶ್ರವಣಕೀರ್ತನಾತ್ | ೩೭ | ಮುಖ್ಯತಸ್ತು ಮಹತ್ಕೃಪಯೈವ ಭಗವತ್ಕೃಪಾಲೇಶಾದ್ ವಾ | ೩೮ | ಮಹತ್ಸಂಗಸ್ತು ದುರ್ಲಭೋಽಗಮ್ಯೋಽಮೋಘಶ್ಚ | ೩೯ | ಲಭ್ಯತೇಽಪಿ ತತ್ಕೃಪಯೈವ | ೪೦ | ತಸ್ಮಿಂಸ್ತಜ್ಜನೇ ಭೇದಾಭಾವಾತ್ | ೪೧ | ತದೇವ ಸಾಧ್ಯತಾಂ ತದೇವ ಸಾಧ್ಯತಾಂ | ೪೨ | ದುಸ್ಸಂಗಃ ಸರ್ವಥೈವ ತ್ಯಾಜ್ಯಃ | ೪೩ | ಕಾಮಕ್ರೋಧಮೋಹಸ್ಮೃತಿಭ್ರಂಶಬುದ್ಧಿನಾಶಕಾರಣತ್ವಾತ್ | ೪೪ | ತರಂಗಾಯಿತಾ ಅಪೀಮೇ ಸಂಗಾತ್ ಸಮುದ್ರಾಯಂತೇ | ೪೫ | ಕಸ್ತರತಿ ಕಸ್ತರತಿ ಮಾಯಾಂ ಯಃ ಸಂಗಂ ತ್ಯಜತಿ ಯೋ ಮಹಾನುಭಾವಂ ಸೇವತೇ ನಿರ್ಮಮೋ ಭವತಿ | ೪೬ | ಯೋ ವಿವಿಕ್ತಸ್ಥಾನಂ ಸೇವತೇ ಯೋ ಲೋಕಬಂಧಮುನ್ಮೂಲಯತಿ ನಿಸ್ತ್ರೈಗುಣ್ಯೋ ಭವತಿ ಯೋಗಕ್ಷೇಮಂ ತ್ಯಜತಿ | ೪೭ | ಯಃ ಕರ್ಮಫಲಂ ತ್ಯಜತಿ ಕರ್ಮಾಣಿ ಸಂನ್ಯಸ್ಸ್ಯತಿ ತತೋ ನಿರ್ದ್ವಂದ್ವೋ ಭವತಿ | ೪೮ | ಯೋ ವೇದಾನಪಿ ಸಂನ್ಯಸ್ಯತಿ ಕೇವಲಮವಿಚ್ಛಿನ್ನಾನುರಾಗಂ ಲಭತೇ | ೪೯ | ಸ ತರತಿ ಸ ತರತಿ ಸ ಲೋಕಾಂಸ್ತಾರಯತಿ | ೫೦ | ಅನಿರ್ವಚನೀಯಂ ಪ್ರೇಮಸ್ವರೂಪಂ | ೫೧ | ಮೂಕಾಸ್ವಾದನವತ್ | ೫೨ | ಪ್ರಕಾಶತೇ ಕ್ವಾಪಿ ಪಾತ್ರೇ | ೫೩ | ಗುಣರಹಿತಂ ಕಾಮನಾರಹಿತಂ ಪ್ರತಿಕ್ಷಣವರ್ಧಮಾನಂ ಅವಿಚ್ಛಿನ್ನಂ ಸೂಕ್ಷ್ಮತರಂ ಅನುಭವರೂಪಂ | ೫೪ | ತತ್ಪ್ರಾಪ್ಯ ತದೇವಾವಲೋಕತಿ ತದೇವ ಶೃಣೋತಿ ತದೇವ ಭಾಷಯತಿ ತದೇವ ಚಿಂತಯತಿ | ೫೫ | ಗೌಣೀ ತ್ರಿಧಾ ಗುಣಭೇದಾದ್ ಆರ್ತಾದಿಭೇದಾದ್ ವಾ | ೫೬ | ಉತ್ತರಸ್ಮಾದುತ್ತರಸ್ಮಾತ್ ಪೂರ್ವ ಪೂರ್ವಾ ಶ್ರೇಯಾಯ ಭವತಿ | ೫೭ | ಅನ್ಯ ಮಾತ್ ಸೌಲಭಂ ಭಕ್ತೌ | ೫೮ | ಪ್ರಮಾಣಾಂತರಸ್ಯಾನಪೇಕ್ಷತ್ವಾತ್ ಸ್ವಯಂ ಪ್ರಮಾಣತ್ವಾತ್ | ೫೯ | ಶಾಂತಿರೂಪಾತ್ ಪರಮಾನಂದರೂಪಾಚ್ಚ | ೬೦ | ಲೋಕಹಾನೌ ಚಿಂತಾ ನ ಕಾರ್ಯಾ ನಿವೇದಿತಾತ್ಮಲೋಕವೇದತ್ವಾತ್ | ೬೧ | ನ ತತ್ಸಿದ್ಧೌ ಲೋಕವ್ಯವಹಾರೋ ಹೇಯಃ ಕಿಂತು ಫಲತ್ಯಾಗಃ ತತ್ಸಾಧನಂ ಚ | ೬೨ | ಸ್ತ್ರೀಧನನಾಸ್ತಿಕಚರಿತ್ರಂ ನ ಶ್ರವಣೀಯಂ | ೬೩ | ಅಭಿಮಾನದಂಭಾದಿಕಂ ತ್ಯಾಜ್ಯಂ | ೬೪ | ತದರ್ಪಿತಾಖಿಲಾಚಾರಃ ಸನ್ ಕಾಮಕ್ರೋಧಾಭಿಮಾನಾದಿಕಂ ತಸ್ಮಿನ್ನೇವ ಕರಣೀಯಂ | ೬೫ | ತ್ರಿರೂಪಭಂಗಪೂರ್ವಕಂ ನಿತ್ಯದಾಸ್ಯನಿತ್ಯಕಾಂತಾಭಜನಾತ್ಮಕಂ ಪ್ರೇಮ ಕಾರ್ಯಂ ಪ್ರೇಮೈವ ಕಾರ್ಯಂ | ೬೬ | ಭಕ್ತಾ ಏಕಾಂತಿನೋ ಮುಖ್ಯಾಃ | ೬೭ | ಕಂಠಾವರೋಧರೋಮಂಚಾಶ್ರುಭಿಃ ಪರಸ್ಪರಂ ಲಪಮಾನಾಃ ಪಾವಯಂತಿ ಕುಲಾನಿ ಪೃಥಿವೀಂ ಚ | ೬೮ | ತೀರ್ಥೀಕುರ್ವಂತಿ ತೀರ್ಥಾನಿ ಸುಕರ್ಮೀ ಕುರ್ವಂತಿ ಕರ್ಮಾಣಿ ಸಚ್ಛಾಸ್ತ್ರೀಕುರ್ವಂತಿ ಶಾಸ್ತ್ರಾಣಿ | ೬೯ | ತನ್ಮಯಾಃ | ೭೦ | ಮೋದಂತೇ ಪಿತರೋ ನೃತ್ಯಂತಿ ದೇವತಾಃ ಸನಾಥಾ ಚೇಯಂ ಭೂರ್ಭವತಿ | ೭೧ | ನಾಸ್ತಿ ತೇಷು ಜಾತಿವಿದ್ಯಾರೂಪಕುಲಧನಕ್ರಿಯಾದಿ ಭೇದಃ | ೭೨ | ಯತಸ್ತದೀಯಾಃ | ೭೩ | ವಾದೋ ನಾವಲಂಬ್ಯಃ | ೭೪ | ಬಾಹುಲ್ಯಾವಕಾಶತ್ವಾದ್ ಅನಿಯತತ್ತ್ವಾಚ್ಚ | ೭೫ | ಭಕ್ತಿಶಾಸ್ತ್ರಾಣಿ ಮನನೀಯಾನಿ ತದುದ್ಬೋಧಕರ್ಮಾಣಿ ಕರಣೀಯಾನಿ | ೭೬ | ಸುಖದುಃಖೇಚ್ಛಾಲಾಭಾದಿತ್ಯಕ್ತೇ ಕಾಲೇ ಪ್ರತೀಕ್ಷ್ಯಮಾಣೇ ಕ್ಷಣಾರ್ಧಮಪಿ ವ್ಯರ್ಥಂ ನ ನೇಯಂ | ೭೭ | ಅಹಿಂಸಾಸತ್ಯಶೌಚದಯಾಸ್ತಿಕ್ಯಾದಿಚರಿತ್ರಾಣಿ ಪರಿಪಾಲನೀಯಾನಿ | ೭೮ | ಸರ್ವದಾ ಸರ್ವಭಾವೇನ ನಿಶ್ಚಿಂತೈರ್ಭಗವಾನೇವ ಭಜನೀಯಃ | ೭೯ | ಸಂಕೀರ್ತ್ಯಮಾನಃ ಶೀಘ್ರಮೇವಾವಿರ್ಭವತ್ಯನುಭಾವಯತಿ ಭಕ್ತಾನ್ | ೮೦ | ತ್ರಿಸತ್ಯಸ್ಯ ಭಕ್ತಿರೇವ ಗರೀಯಸೀ ಭಕ್ತಿರೇವ ಗರೀಯಸೀ | ೮೧ | ಗುಣಮಾಹಾತ್ಮ್ಯಾಸಕ್ತಿ-ರೂಪಾಸಕ್ತಿ-ಪೂಜಾಸಕ್ತಿ-ಸ್ಮರಣಾಸಕ್ತಿ-ದಾಸ್ಯಾಸಕ್ತಿ-ಸಖ್ಯಾಸಕ್ತಿ- ವಾತ್ಸಲ್ಯಸಕ್ತಿ-ಕಾಂತಾಸಕ್ತಿ-ಆತ್ಮನಿವೇದನಾಸಕ್ತಿ-ತನ್ಮಯತಾಸಕ್ತಿ-ಪರಮವಿರಹಾಸಕ್ತಿ-ರೂಪಾ ಏಕಧಾ ಅಪಿ ಏಕಾದಶಧಾ ಭವತಿ | ೮೨ | ಇತ್ಯೇವಂ ವದಂತಿ ಜನಜಲ್ಪನಿರ್ಭಯಾಃ ಏಕಮತಾಃ ಕುಮಾರ-ವ್ಯಾಸ-ಶುಕ-ಶಾಂಡಿಲ್ಯ-ಗರ್ಗ-ವಿಷ್ಣು- ಕೌಂಡಿಣ್ಯ-ಶೇಷೋದ್ಧವಾರುಣಿ-ಬಲಿ-ಹನುಮದ್-ವಿಭೀಷಣಾದಯೋ ಭಕ್ತ್ಯಾಚಾರ್ಯಾಃ | ೮೩ | ಯ ಇದಂ ನಾರದಪ್ರೋಕ್ತಂ ಶಿವಾನುಶಾಸನಂ ವಿಶ್ವಸಿತಿ ಶ್ರದ್ಧತೇ ಸ ಭಕ್ತಿಮಾನ್ ಭವತಿ ಸಃ ಪ್ರೇಷ್ಟಂ ಲಭತೇ ಸಃ ಪ್ರೇಷ್ಟಂ ಲಭತೇ | ೮೪ |