ಶ್ರೀರಾಮಕೃಷ್ಣ ಶಿಷ್ಯವೃಂದಸ್ತೋತ್ರ

ಮಧುಪಂ ಮಧುರಾಕಾರಂ ಭಕ್ತಹೃತ್ಪದ್ಮವಾಸಿನಮ್‌ | ಭಕ್ತಿ-ಮಧು ಪಿಬಂತಂ ತಂ ರಾಮಕೃಷ್ಣಂ ನಮಾಮ್ಯಹಮ್‌ ॥ ೧ ॥ ಶಾರದಾಂ ಸಾರದಾಂ ವಂದೇ ಘೋರಸಂಸಾರತಾರಿಣೀಮ್‌ | ಮಾತರಂ ಸರ್ವಲೋಕಾನಾಂ ಸತಾಂ ಚಾಪ್ಯಸತಾಂ ಶುಭಾಮ್‌ ॥ ೨ ॥ ಯೋ ವಾಕ್ಶಕ್ತ್ಯಾ ಜಗತ್ಕೃತ್ಸ್ನಂ ಜಿತವಾನ್‌ ಧೃತವಾನ್‌ ತಥಾ। ವೀರಸನ್ಯಾಸಿನಂ ವಂದೇ ವಿವೇಕಾನಂದಯೋಗಿನಮ್‌ ॥ ೩ ॥ ಬ್ರಹ್ಮಾನಂದಮಹಂ ವಂದೇ ಶ್ರೀಕೃಷ್ಣಚರಣಾಶ್ರಿತಮ್‌ | ಗುರೋಃ ಶ್ರೀರಾಮಕೃಷ್ಣಸ್ಯ ಪುತ್ರಂ ಮಾನಸಮಸ್ಪೃಹಮ್‌ ॥ ೪ ॥ ಪ್ರೇಮಾನಂದಮಹಂ ವಂದೇ ರಾಧಾಪ್ರೇಮಾಂಶಸಂಭವಮ್‌ | ಶ್ರೀರಾಮಕೃಷ್ಣಸಂಪ್ರೀತೇಃ ಮೂರ್ತರೂಪಂ ಪ್ರಭಾನ್ವಿತಮ್‌ ॥ ೫ ॥ ವಂದೇಽಹಮದ್ಭುತಾನಂದಮಕ್ಷರಸ್ಥಂ ನಿರಕ್ಷರಮ್‌ | ಸೇವಯಾ ರಾಮಕೃಷ್ಣಸ್ಯ ಸಂಸಿದ್ಧಿಂ ಪ್ರಾಪ್ತವಾನಸೌ ॥ ೬ ॥ ಪ್ರಸನ್ನವದನಂ ಶಾಂತಂ ಶಿವಾನಂದಮಹಾಮುನಿಮ್‌ | ಮಹಾಪುರುಷನಾಮ್ನಾಪಿ ಖ್ಯಾತಂ ತಂ ಪ್ರಣಮಾಮ್ಯಹಮ್‌ ॥ ೭ ॥ ಯೋಗಾನಂದಂ ಮಹಾಪೂಜ್ಯಂ ಮೃದುಶೀಲಂ ದೃಢವ್ರತಮ್‌ | ಶಾರದಾರ್ಪಿತಚಿತ್ತಂ ತಂ ಪ್ರಣಮಾಮಿ ಮುಹುರ್ಮುಹುಃ ॥ ೮ ॥ ನಿರಂಜನಂ ಮಹಾರ್ಕಾಭಂ ತಂ ವಂದೇ ಸಾಹಸಪ್ರಿಯಮ್‌ | ಜ್ಞಾನಾಂಜನಸಮಾಯುಕ್ತಮ್‌ ಅಜ್ಞಾನದಹನಕ್ಷಮಮ್‌ ॥ ೯ ॥ ವಂದೇ ತಂ ಸಾರದಾನಂದಂ ನಿಶ್ಚಲಂ ಸಾರದಾಪ್ರಿಯಮ್‌ | ಗುರೋರ್ಲೀಲಾಪ್ರಸಂಗೇನ ಪ್ರಾಪ್ತವಾನ್‌ ಯಃ ಕೃತಾರ್ಥತಾಮ್‌ ॥ ೧೦ ॥ ತುರೀಯಸಂಸ್ಥಿತಂ ವಂದೇ ತುರೀಯಾನಂದಯೋಗಿನಮ್‌ | ವೇದಾಂತತತ್ತ್ವನಿಷ್ಣಾತಂ ತಪಶ್ಚರಣತತ್ಪರಮ್‌ ॥ ೧೧ ॥ ರಾಮಕೃಷ್ಣಗತಪ್ರಾಣಂ ರಾಮಕೃಷ್ಣಪದಾಶ್ರಿತಮ್‌ | ತತ್ಪೂಜಾನಿರತಂ ರಾಮಕೃಷ್ಣಾನಂದಂ ನಮಾಮ್ಯಹಮ್‌ ॥ ೧೨ ॥ ಅಖಂಡಸೇವಾನಿರತಂ ಜೀವಾನಾಂ ಶಿವಭಾವತಃ | ಅಖಂಡಾನಂದಮೀಡೇಽಹಂ ನರೇಂದ್ರಸ್ಯ ಪದಾನುಗಮ್‌ ॥ ೧೩ ॥ ಸುಬೋಧಂ ಬೋಧಸಂಯುಕ್ತಂ ಮೃದುಭಾಷಿಶಿಶೂಪಮಮ್‌ | ಸ್ವಭಾವಸರಲಂ ಶಾಂತಂ ನಮಾಮಿ ಕರುಣಾಮಯಮ್‌ ॥ ೧೪ ॥ ಜ್ಞಾನವೃದ್ಧಂ ವಯೋವೃದ್ಧಮ್ ಅದ್ವೈತಾನಂದಯೋಗಿನಮ್‌ | ರಾಮಕೃಷ್ಣಸ್ಯ ಸೇವಾರ್ಥಂ ತ್ಯಕ್ತಸರ್ವಂ ನಮಾಮ್ಯಹಮ್‌ ॥ ೧೫ ॥ ನಿರ್ಧೂತಲೋಕಮರ್ಯಾದಮ್‌ ಅವಧೂತಸ್ವಭಾವತಃ | ವಂದೇ ವಾಸ್ತುಕಲಾವಿಜ್ಞಂ ವಿಜ್ಞಾನಾನಂದಯೋಗಿನಮ್‌ ॥ ೧೬ ॥ ತತ್ತ್ವಜ್ಞಂ ಯೋಗಿವರ್ಯಂ ತಮಭೇದಾನಂದಯೋಗಿನಮ್‌ | ಜ್ಞಾನಪ್ರಸಾರವಿಖ್ಯಾತಂ ವಂದೇಽಹಂ ಪಂಡಿತೋತ್ತಮಮ್‌ ॥ ೧೭ ॥ ನಮಾಮಿ ತ್ರಿಗುಣಾತೀತಂ ಗುಣಾಢ್ಯಂ ಗುಣವರ್ಧಕಮ್‌ | ಉದ್ಬೋಧನೇನ ವಿಖ್ಯಾತಮುದ್ಬೋಧನಸಮನ್ವಿತಮ್‌ ॥ ೧೮ ॥ ಮಹೇಂದ್ರಂ ಭಕ್ತವರ್ಯಂ ತಂ ವಿದ್ಯಾವಿನಯಭೂಷಣಮ್‌ | ಕಥಾಮೃತಂ ಪಿಬನ್ತಂ ಚ ಸ್ವಗುರೋಃ ಪ್ರಣಮಾಮ್ಯಹಮ್‌ ॥ ೧೯ ॥ ಗಿರೀಶಂ ಭೈರವಂ ವಂದೇ ಭಕ್ತಿನಿರ್ಧೂತಕಲ್ಮಷಮ್‌ | ಶ್ರದ್ಧಯಾರ್ಜಿತಸಂಸಿದ್ಧಿಂ ನಟಶ್ರೇಷ್ಠಂ ಕಲಾವಿದಮ್‌ ॥ ೨೦ ॥ ನಾಗಂ ಮಹಾಶಯಂ ವಂದೇ ಭಕ್ತಶ್ರೇಷ್ಠಂ ಮುಹುರ್ಮುಹುಃ | ಪರಮಾದ್ಭುತಚಾರಿತ್ರ್ಯಂ ನಿರ್ಮಾನಂ ಮಾನದಂ ವರಮ್‌ ॥ ೨೧ ॥ ಬಲರಾಮಂ ರಾಮಚಂದ್ರಂ ಸುರೇಶಂ ಶಂಭುಮಲ್ಲಿಕಮ್‌ | ಅನ್ಯಾನ್‌ ಭಕ್ತಗಣಾನ್‌ ವಂದೇ ರಾಮಕೃಷ್ಣಪದಾಶ್ರಿತಾನ್‌ ॥ ೨೨ ॥ ಏಕಂ ಯಂ ಬಹುನಾಮರೂಪವಿಧಿಭಿಃ ಹಿಂದುಃ ಸದಾ ಹ್ಯರ್ಚತಿ ಯಂ ಬೌದ್ಧಾ ಅಪಿ ಬುದ್ಧ ಇತ್ಯನುದಿನಂ ಸಂಕೀರ್ತ್ಯ ರೋಮಾಂಚಿತಾಃ। ಯೋಽಯಂ ಕ್ರಿಸ್ತಪದಾಭಿಧೋ ಬಹುಜನೈರಲ್ಲೇತಿ ಚೇಡ್ಯಶ್ಚ ಯಃ ತಂ ಸಚ್ಚಿತ್ಸುಖಮಾನತೋಽಸ್ಮಿ ಪರಮಂ ಶ್ರೀರಾಮಕೃಷ್ಣಂ ಗುರುಮ್‌ ॥ ೨೩ ॥ ಅಸಂಖ್ಯಭಕ್ತಮಧುಪಾ ಯತ್ಪಾದಕಮಲಾಶ್ರಿತಾಃ | ಯತ್ರ ಪ್ರೇಮಪ್ರಮತ್ತಾಸ್ತೇ ತತ್ಪಾದಂ ಶರಣಂ ವ್ರಜೇ ॥ ೨೪ ॥ ಏತೇನ ಸ್ತೋತ್ರಪುಷ್ಪೇಣ ಭಕ್ತ್ಯಾ ಮೋದಯುತೇನ ಚ | ಅರ್ಚನ್ತಿ ರಾಮಕೃಷ್ಣಂ ಯೇ ತೇ ಬ್ರಹ್ಮಪದಮಾಪ್ನುಯುಃ ॥ ೨೫ ॥