ಅವ್ಯಕ್ತದಿಂದುದಿಸಿ ವ್ಯಕ್ತವೇಷವ ಧರಿಸಿ

ಅವ್ಯಕ್ತದಿಂದುದಿಸಿ ವ್ಯಕ್ತವೇಷವ ಧರಿಸಿ ನಿಂದಿರುವ ಮಾಂತ್ರಿಕನು ಪುಂಗಿ ನುಡಿಸೆ | ಆ ಅನಾಹತ ನಾದ ಜಗವ ಜುಮ್ಮೆನಿಸಿತ್ತು ಸಕಲ ಸಚರಾಚರವ ಮರುಳುಗೊಳಿಸೆ || ನಾಮರೂಪಾತೀತನೆಂಬ ಹೆಸರನು ಹೊತ್ತು ಕಾಲದೇಶದ ಗಡಿಗಳಾಚೆಯಿಂದಡಿಯಿಟ್ಟು ಬಂದು ಮೈದೋರಿರುವ ಮಂತ್ರಗಾರ | ವೈರಾಗ್ಯವೇತ್ರವನು ಗರಗರನೆ ತಿರುಗಿಸುತ ಭವಭ್ರಾಂತಿಯನ್ನೊದೆದ ತಂತ್ರಗಾರ || ಸರ್ವಧರ್ಮಗಳನ್ನು ಮಣಿಗಳನೆ ಮಾಡುತ್ತ ತನ್ನ ಸಿರಿಬಾಳ ಶ್ರೀಸೂತ್ರದಲಿ ಪೋಣಿಸುತ ತಾನೆ ಧರಿಸುತ ಮೆರೆದ ಸೂತ್ರಧಾರ | ವಚನವೇದದ ಮಧುರ ಮಂತ್ರಘೋಷವ ಮೊಳಗಿ ಲೌಕಿಕವ ಕಳೆವ ಪರಮಾರ್ಥಸಾರ ||