ದಶಾವತಾರಸ್ತೋತ್ರಮ್

ಪ್ರಲಯಪಯೋಧಿಜಲೇ ಧೃತವಾನಸಿ ವೇದಂ ವಿಹಿತವಹಿತ್ರಚರಿತ್ರಮಖೇದಂ ಕೇಶವ ಧೃತಮೀನಶರೀರ ಜಯ ಜಗದೀಶ ಹರೇ || ಕ್ಷಿತಿರತಿವಿಪುಲತರೇ ತವ ತಿಷ್ಠತಿ ಪೃಷ್ಠೇ ಧರಣಿಧರಣಕಿಣಚಕ್ರಗರಿಷ್ಠೇ ಕೇಶವ ಧೃತಕಚ್ಛಪರೂಪ ಜಯ ಜಗದೀಶ ಹರೇ || ವಸತಿ ದಶನಶಿಖರೇ ಧರಣೀ ತವ ಲಗ್ನಾ ಶಶಿನಿ ಕಲಂಕಕಲೇವ ನಿಮಗ್ನಾ ಕೇಶವ ಧೃತಸೂಕರರೂಪ ಜಯ ಜಗದೀಶ ಹರೇ || ತವ ಕರಕಮಲವರೇ ನಖಮದ್ಭುತಶೃಂಗಂ ದಲಿತಹಿರಣ್ಯಕಶಿಪುತನುಭೃಂಗಂ ಕೇಶವ ಧೃತನರಹರಿರೂಪ ಜಯ ಜಗದೀಶ ಹರೇ || ಛಲಯಸಿ ವಿಕ್ರಮಣೇ ಬಲಿಮದ್ಭುತವಾಮನ ಪದನಖನೀರಜನಿತಜನಪಾವನ ಕೇಶವ ಧೃತವಾಮನರೂಪ ಜಯ ಜಗದೀಶ ಹರೇ || ಕ್ಷತ್ತ್ರಿಯರುಧಿರಮಯೇ ಜಗದಪಗತಪಾಪಂ ಸ್ನಪಯಸಿ ಪಯಸಿ ಶಮಿತಭವತಾಪಂ ಕೇಶವ ಧೃತಭೃಗುಪತಿರೂಪ ಜಯ ಜಗದೀಶ ಹರೇ || ವಿತರಸಿ ದಿಕ್ಷು ರಣೇ ದಿಕ್ಪತಿಕಮನೀಯಂ ದಶಮುಖಮೌಲಿಬಲಿಂ ರಮಣೀಯಂ ಕೇಶವ ಧೃತರಘುಪತಿರೂಪ ಜಯ ಜಗದೀಶ ಹರೇ || ವಹಸಿ ವಪುಷಿ ವಿಶದೇ ವಸನಂ ಜಲದಾಭಂ ಹಲಹತಿಭೀತಿಮಿಲಿತಯಮುನಾಭಂ ಕೇಶವ ಧೃತಹಲಧರರೂಪ ಜಯ ಜಗದೀಶ ಹರೇ || ನಿಂದಿಸಿ ಯಜ್ಞವಿಧೇರಹಹ ಶ್ರತಿಜಾತಂ ಸದಯಹೃದಯದರ್ಶಿತಪಶುಘಾತಂ ಕೇಶವ ಧೃತಬುದ್ಧಶರೀರ ಜಯ ಜಗದೀಶ ಹರೇ || ಮ್ಲೇಚ್ಛನಿವಹನಿಧನೇ ಕಲಯಸಿ ಕರವಾಲಂ ಧೂಮಕೇತುಮಿವ ಕಿಮಪಿ ಕರಾಲಂ ಕೇಶವ ಧೃತಕಲ್ಕಿಶರೀರ ಜಯ ಜಗದೀಶ ಹರೇ || ಶ್ರೀಜಯದೇವಕವೇರಿದಮುದಿತಮುದಾರಂ ಶೃಣು ಸುಖದಂ ಶುಭದಂ ಭವಸಾರಂ ಕೇಶವ ಧೃತದಶವಿಧರೂಪ ಜಯ ಜಗದೀಶ ಹರೇ ||